Журналымыздың бұл саны «Цифрлық дәуірдегі мектеп білімі: негізгі трендтер мен талаптар» тақырыбындағы NIS Халықаралық ғылыми-практикалық конференциясына арналады. Цифрлық технологиялардың қарқынды дамуы және оларды білім беру ортасына кіріктіру жағдайында қазіргі заманғы мектептің қызметіндегі жаңа тәсілдемелерді, құралдар мен сын-талаптарды жан-жақты пайымдап түсіну қажеттілігі туындайды.

Бұл басылымда білім берудегі цифрлық трансформацияның негізгі аспектілеріне – оқу процесіне жасанды интеллектіні енгізу, бейімделген оқыту платформаларын дамыту, ЖИ-сауаттылықты қалыптастыру, академиялық адалдықты қамтамасыз ету, сондай-ақ педагогтер мен білім беру ұйымдарын цифрлық орта жағдайында жұмыс істеуге даярлау мәселелеріне баса назар аударылады. Цифрлық технологияларды қолданудағы этикалық, қауіпсіздік, құндылық бағдарлары мен әлеуметтік жауапкершілік мәселелерін зерделеуге ерекше назар аударылады.

Ұлыбритания, Нидерланды, Гонконг, Аустралия, Испания мен Қазақстанның ғылыми және білім беру ұйымдарының өкілдері, білім беру саласындағы жетекші отандық және шетелдік сарапшылар өздерінің құнды идеяларымен, практикалық жұмыстарымен және зерттеу нәтижелерімен бөліседі. Олардың тәжірибесі мектепте білім берудің болашағын пайымдауға бағытталған көзқарасты тереңдетуге және цифрлық дәуірде дамытудың тұрақты стратегияларын қалыптастыруға ықпал етеді.